Opak Cellar 傲柏酒窖
不二之選的婚宴酒商
《婚宴酒秘笈》
一場婚禮，無論大搞定細搞，相信每對新人都花唔少心機同時間（同埋錢）去推砌而成
由揀日子、場地、佈置、婚攝、化妝、過大禮、回禮、司儀、律師等等，普普通通都隨時可以有二三十樣野要搞
仲要好多野都無得假手於人要親力親為，真係唔係講笑！
其實搞咁多野最終目的都係希望帶俾當日出席朋友歡樂同留俾自己有個美好回憶......
無錯！真係除左兩位會有回憶，其他出席朋友只係當刻歡樂，瞓醒就......
唔信呀？
就即刻黎個實驗吖
相信大家都曾經被邀請出席參加過婚宴啦
不如俾幾秒大家回想下當日有啲咩事發生到呢刻你地都仲記得？
嗱！俾左幾多人情呢啲過左去就算啦
同埋私人恩怨我地唔方便插手
所以都係再諗其他啦
點先？........
係咪好似諗唔到？
正常架，原因係覺得好似每個婚宴都差唔多，變化唔大係咪？
其實仲有......
就係你地唔夠投入！！！
「大佬呀，我又唔係主角，點投入呀！」
你都啱，我更正！
係主角未能夠令你地投入！
原因......因為佢地缺水！
係酒水個水！
全句翻譯大致為......
「當日主角提供唔到令你飲完會追住再飲，夜晚返到屋企寧願阻人洞房都要問下喺邊買嘅酒！」
誇張？！
如果大家喺飲宴到飲過啲酒係又酸又澀淨係得酒精味，之後仲令到大家自始對葡萄酒好抗拒嘅話就會覺得誇張
但若果相反，主人家安排到支配到餐或者你會一飲再飲嘅酒你地就會明白其實唔誇張
一支正嘅酒真係可以令到平時唔飲酒嘅人都會飲埋一份
真係"I人"都變"E人"
所以我地都幾夠膽同大家講，要令到一場婚禮全場氣氛高漲唔係單單搵個勁嘅 MC 就幫到你
因為就算再勁嘅 MC 都需要大家有"互動性"先可以做到更高漲效果......
所以真係唔好睇少酒喺婚禮嘅重要性
如果唔係出席婚宴又點會叫"去飲"呢，真係有歷史記載架
既然都肯花心機同時間去安排場地、佈置、回禮等項目，其實行多一步揀埋支合適嘅酒就可以令成件事更完美
好喇！講完點解要揀酒，就講下點樣去揀酒
「求其啦，都無乜人飲架啦」
呢句說話通常都係自己本身少飲甚至唔飲所以先咁講
你嚟得啱喇，呢篇野就係俾你睇
大家試諗下
一場婚禮閒閒地都有一佰幾十人出席
當中一定有唔少賓客對葡萄酒係有研究或者平時都會飲下酒
如果大家好隨意咁選用場地提供所謂"酒席包埋"嘅酒或者一啲好平價嘅超市酒招呼朋友
你地就會成為被人瞓醒就忘記嘅一群
嗱，冷靜啲聽埋我地嘅分析先起哄都未遲
明白唔能夠百份百用價錢衡量質素，但想俾大家知道
一支酒係需要由外國種植、收摘、釀造、入樽、包裝、運送等咁多流程先到香港再轉售（仲未講人工）
如果都只係賣幾十蚊，咁支酒可以提供到咩質素留返俾大家思考......
唔係話要大家唔好慳，亦唔係要大家揮霍，係要大家理性消費，應使得使
亦有唔少準新人喺揀場地及酒席時會加購"每圍只需一個固定金額就可無限任飲"嘅項目
明白嘅，好可能係因為唔識選酒或者唔識預數量所以就做咗呢個決定
都無問題嘅，但......
或者咁，我地先分享下啲數量點預
再交俾大家自行判斷"任飲價"值唔值得俾
根據我地參與過咁多場婚紗展同處理過咁多單婚宴收集返黎嘅經驗，晚宴一般每圍大概三支就係"人頭數"
（"人頭數"即係人人有份，好似大家喺酒席餐單上預份量咁，一圍 12 人就有 12 位份量咁解）
而喺宴會上炒散哥哥/姐姐一般斟酒都會比較重手（怕斟太少會失禮人家）
以一支 750ml 嘅葡萄酒經佢地手大概斟到 4 至 5 杯，一圍預三支即係 12 至 15 杯，"人頭數"就係咁計出黎
所以"人頭數"其實係基本份量亦即係最低數量，等同大家唔會因為某一兩圍賓客食量少就預先減份量
當然若果已預早知道好多賓客係酒鬼就加至每圍五支其實都已經足夠！
講完晚宴就講吓午宴
午宴酒水數量一般會較晚宴少，大概少 30%
因為始終唔及晚宴賓客散場後就返屋企，好多時出席完午宴後都有下場，所以飲酒人數及份量相對都會少
有咗個初步概念，跟住大家就一齊計計數
今次我地攞個晚宴中位數每圍四支去計算吖
舉例擺 20 圍，即係 80 支
假設一圍"任飲價"係 $800，即係合共 $16000
$16000 除返開 80 支酒，每支 $200
$200 一支酒如果大家有試過又係有質素嘅話絕對俾得過（不過其實喺我地 Opak Cellar $120 - $150 已經可以搵到好有質素）
但如果 $200 一支係上面提及嗰類又酸又澀淨係得酒精味嘅酒就真係......
到時"E人"都變返"I人"
仲有喎，支酒質素唔好，會導致飲嘅人少左，由每圍飲四支變成每圍飲兩支，變相平均每支酒就係 $400
到時錢就花咗，俾多左差唔多一圍酒席嘅酒水價錢，但都係會瞓醒就唔記得你地
所以呢，我地成日都話，錢付出咗，換唔換到預期效果先係重點
分享完點預數量，就分享下個比例
一直以黎傳統中式婚宴呢類喜慶事都係用紅酒為主，所以佔比正常係較高
相信大家上網做資料搜集時應該都係建議大家揀紅酒為主
但事實又係唔係咁？
我地根據過往從新人擺完酒後收集返黎嘅結果顯示係完全相反
白酒（唔係中國嗰啲呀）消耗速度係較快，數量亦都係較高
可能後生嗰班（即係你地）都係鍾意飲下凍野同埋又容易配餐嘅關係所以白酒跑出咗
令到我地依家都開始改下口，以晚宴一圍三支為例，兩白一紅啦（與時並進做法）
而午宴就更加係白酒佔比會更高，都幾大原因關氣溫事，香港天氣咁熱
當你 12 月都仲著緊短衫短褲時，試想下喺一個烈日當空下嚟到會場，就算唔飲都揸住杯凍嘢降下溫啦
仲猶豫嘅話，咁你地就將個紅白酒比例一比一啦，費事你地個心囉囉攣
不過到時唔夠白酒飲唔好要我地即刻送過嚟呀，嗱！有前科架
數量同比例都分享完，分享下喺不同場合下通常會用咩類別酒
證婚：
一般會選用高氣泡酒類，即係個酒塞開出嚟時可以"pop"一聲嗰類酒（其實專業嘅開法應該只係漏氣聲）
準新人可視乎 Budget 而選擇法國香檳 Champagne 或各國氣泡酒，常見如法國 Crémant、西班牙 Cava、意大利 Prosecco 等
除咗氣泡酒，亦可選用天生麗質嘅 Rosé（粉紅酒），淨係粉紅色三個字都夠晒浪漫啦
甚或乎近年都多新人選用嘅甜白酒，例如意大利 Moscato d'Asti 都係一個唔錯選擇
一來甜甜地易入口，二來酒精度數低，無咁快收檔，仲可以喺清醒情況下食到乳豬
而證婚期間酒水數量預算方面大概係宴會總人數嘅三份一酒份量就可以
因為證婚環節一般斟酒份量會相對較少，一支 750ml 大概可斟 8 杯左右
舉例 20 圍，有 240 位賓客，預大概三份一人酒份量，即係 80 人，預算 10 支就可以
唔夠飲點算？開席再劈過囉！
午宴/晚宴：
上文提及過，如擺午宴，仲係烈日當空
如想再突出埋外面仲喺陽光普照嘅氣氛，清爽得嚟聽到都已經涼快嘅氣泡酒真係絕配
加上氣泡酒本身就係一款百搭酒，配中西菜式都做到平衡效果
而同樣屬於清爽型亦可選擇 Chardonnay 或 Sauvignon Blanc 呢兩類葡萄品種
果香氣濃郁加上偏 dry（唔太甜），既可提升貝殼類或魚類海鮮風味，亦可平衡白肉油膩感，高度推介俾西式餐單嘅你
另一款較常出現喺宴會嘅白酒係 Riesling （葡萄品種）
因為本身自帶一定酸度可提升食慾同時亦可中和食物油脂感，如配搭口味相對偏濃嘅中菜就係其中一個唔錯選擇
但揀選時要留意 Riesling 甜度，配餐盡量唔好選太甜，會蓋過食物鮮味
而紅酒方面，較為傳統品種如 Cabernet Sauvignon、Merlot、Syran 呢類葡萄都係老是常出現
相信係同仍有唔少傳統法國紅酒擁護者有關，而以上幾款葡萄正正就係法國波爾多最主力種植品種
舊世界紅酒除法國外，仲有意大利呢個葡萄品種多到數都數唔晒嘅國家
既有傳統釀做方式嘅紅酒，亦有近年越來越多人鍾意飲嘅氣泡紅酒 Lambrusco，可因應不同場合而揀選甜度，證婚或配餐都合適
最正係雪凍後嗰種涼快感，啱晒香港啲咁熱天氣
如果唔想走傳統路線，氣泡紅酒 Lambrusco 係非常唔錯選擇
我地好多客約試酒時試完都買返幾支返屋企自肥咗先
講開紅酒，準備擺西式嘅你有一點要留意
如餐單上重點係海鮮類就一律建議選用白酒！白酒！白酒！
因為要搵到支夾到海鮮唔會產生一種鐵銹味嘅紅酒唔容易
都係乖乖地揀返支可令食材提鮮嘅白酒啦
睇到呢到，如果本身對葡萄酒有一定了解嘅你可能會覺得上面嘅葡萄酒種類普通，想揀返晒你地喜好嘅酒款
等等先，因為根據我地嘅經驗，好多葡萄酒鬼會用咗自己方向去揀晒啲靚酒/高年份酒
但最後因為外圍因素下令到支酒未能將最好嘅表現帶到俾賓客，最終弄巧反拙
求其講兩個最常出現嘅情況
1，花盡心機揀左款靚酒，但因為唔夠時間醒酒，最後係點？為咗所有人都睇得明，我地唯有用"無咁好飲囉"嚟形容
「簡單啦！早啲開咪得囉！」
開席前第一 round 係可以做到，但第二 round 因為預估唔到時間所以支酒未醒好都會照斟，到時兩杯唔同味個分別可能仲大
2，好貪心咁同時揀咗幾款不同葡萄品種或不同產區嘅酒，諗住可以有唔同風格嘅酒俾啲賓客好好享受吓
出發點係好，但呢點要睇對象（賓客 & 斟酒嗰位），如果對象本身對葡萄酒有一定認知就會好啲，否則尷尬情況就會出現
尷尬一：唔熟酒嘅賓客飲完第一杯 A 款葡萄酒，喺唔知情嘅情況被斟咗 B 款，唔熟酒嘅賓客隨時會以為支酒變咗
尷尬二：飲宴期間對炒散哥哥/姐姐嚟講真係打緊仗咁，一有時間就會睇吓邊個隻杯少咗幾啖就會衝去斟酒
隨時手快快斟咗其他款幫你 blend 埋杯酒大家都唔知
聽到呢度如果仲係好堅持想揀幾款唔同類別咁點算？
我地會建議準新人整靚張 Wine list 出嚟俾啲賓客到時可以選擇
但講明先，唔係百份百可以解決晒所有問題
因為通常去到中段就會開始失衡，一部份會唔夠飲，而另一部份就仍有好多
有得揀未必係好事，大家明啦
當大家都有晒方向同數量之後，就要知道幾時開始要做嘢
知道大部份人都係 deadline fighter，但奉勸大家真係唔好太遲先搞
我地最高紀錄係試過有新人 Big day 當日先搵幾個兄弟上嚟我地門市買酒，真係欣賞佢地嘅淡定，佩服！
但呢啲錯誤示範聽完就算，唔好學
一般我地建議準新人在 Big day 前三個月內訂酒都可以
而訂酒前可以先向宴會場地查詢一啲細則，例如會否徵收開瓶費、場地有否贈送酒水等，呢啲都係會影響到大家訂酒數量
另外記得詢問埋場地送貨安排，因為有少部份場地只可 Big day 當日收貨（一般預早最少一至兩日送到）
如果係擺午宴又係星期日咁就麻煩喇，因為時間太緊迫同埋一般運輸哥哥星期日都休息關係，隨時需要兄弟幫拖自己搬
以上都係需要留意地方
如果大家都想搵我地 Opak Cellar 了解更多資訊或預約試婚宴酒，可 call / whatsap: 56479963 / 95088953
我地嘅婚宴酒服務係有專人負責跟進
*為保障所有客戶已訂購商品能夠如期送出，我地只會提供現貨讓準新人試酒及訂購
*絕對不會等待收到客人訂單後再向供應商訂貨，可避免因船期延誤而帶來交唔到貨問題
*所有訂單一經確認會繼續寄存在我地 24 小時恆溫倉庫內，確保品質不會因溫差大而造成影響
*客人訂購每一箱酒都會貼上附有客人資料的"箱頭紙"，清晰讓會場職員明確知道用處，杜絕"開錯其他人嘅酒"情況出現
*所有訂單均會在宴會前一至兩天送達，以便會場職員可預早安排
最後，我地理解籌辦婚禮過程中出席人數會不斷調整，所以準新人訂酒後都可隨時聯繫我地作出調整
要準備一場婚禮對好多準新人嚟講絕對唔容易，始終大家都無經驗，如果你同我地講你好有經驗我地反而仲緊張
所以婚宴酒呢啲嘢，放心交返俾我地 Opak Cellar 幫你跟啦
收拾好心情準備做人妻/人夫就可以
